Wafrös alemannische Dialektik vom 8. Juni 2005

Wenn ebbes it glei so duet, wie mir des gern hetted, no saged mir im Hegau und am See, »'harzet«. Wenn's oemeds harzet, noklemmt's, no lauft's zäh oder iberhaupt it, weil s'Harz kläbrig isch, im Gegesatz vum Öl, sell schmiert, und wenn ebbes lauft wie g'schmiert, no isch des grad s'Gegeteil wie wenn's harzet. Harz isch ä komplizierte chemische Verbindung und unsereins kennt Harz eigentlich nu a de Nodleböm, oder hekschtens no als Kolofonium, wo me de Giigeboge mit eireibt, damit er rauh wird. Etz mößt mer noch dere neie Schreibweis »rau« ohne »h« schreibe, aber i schreib's no mit »h«, weil i des schäner find. Wenn's Harz ä paar taused Johr alt isch, also fossiliert, no isches Bernschtein, aber des hot all's dodemit nint z'tued, dass Harz kläbrig isch, wa mir als Buebe no g'wisst hond, weil mer harzige Händ g'het hond vum Holzbiige. Des wared no die Zeite, wo au de junge Mensch gelegentlich ebbes hot tue möße wa en Sinn g'het hot, heit saged se do, wa »Sinn macht«, als ob mer Sinn mache kännt. Mir mached zwar all meh wa kon Sinn hot und z'mol schtellemer denn fescht, dass ebbes, wa kon Sinn hot, au kon Sinn macht. Wa des mit Harz z'tued hot, isch ganz eifach. De Personalschef vu VW heißt Peter Hartz, hot also no ä »t« im Harz, und der hot en Reformplan erfunde, wo unsere Bundesregierung mit Begeischterung ufgnumme hot und die Schwarze i de Opposizion wared mitsamt de Gwerkschafte au weng defir, scho elei deswäge, weil se sich alle gset hond, dass so en erfolgreiche Autokonzern schließlich ko Rindvieh als Personalschef beschäftigt. Des Wort vu de »Hartz-Reform« war des neie Zauberwort, mit dem mer den verfahrene Sozialkarre wieder flott kriege hett solle, wa erfolgreiche Ordnung i de Arbeitsmarkt bringe dät und wo die Arbeitslose vu de Schtroß fäget. Weil aber Opposizion it zuegäe ka, dass de Regierungsparteie ebbes Vernimftigs eifallt, weil des i de Auge vu de CDU-CSU-FDP bi de Rot-Grüene iberhaupt it meglich sei ka, hond se noch em Afangsjubel a dere Reformume drillet, bis etz s'Gegeteil vunere Reform drus worre isch, so äbbes wie ä Desaschter. Des Hartz IV-Modell hot kon Ufschwung brocht, wie se zerscht agnumme hond, sondern koscht etz sogar Milliarde meh, vu däne ko Sau woß, womer se hernäeh kännt. Mer hot so s'Gfihl, als ob die Rote und die Grüene, die Schwarze und die Gäele am Turmbau zu Babel hocked, wode HERR herabgeschtiegen isch und gset hot, lasset uns ihre Schproch verwirre. Des Hartz IV harzet, dass'es de Sau graust, aber wenn etz denn die Schwarze mit de Gäele drakummed, no lauft's wieder wie g'schmiert, s'frogt sich nu, mit wa se denn schmiere wänd und am End sind die Agschmierte denn wieder die gliiche wie etz au ...

Von Walter Fröhlich