Wafrös alemannische Dialektik vom 11. Mai 2005

En richtig saumäßig guete Kumpel, wo mit mir zamme scho iber fufzg Johr i de Narrezunft isch, der hot en Tschob, woner so guet wie all's i sinere Firma mache moß, genauer gset, hot mache möße, weil er au scho ä Weile Rentner isch. Selle, wo des Wort Rentner it esogern hond, die saged meischtens pensioniert, obwohl sell verloge isch, weil nu Beamte pensioniert wäred und kone gwöhnliche Leit. Also der Prachtsmensch der heißt Paule und ghört zu sellene, wo all's könned und under anderem hot de Paule au möße gelegentlich miteme große Laschtwage fahre, weil de Paule all's hot fahre känne, wa Räder hot. Etz sind emol so junge Kerle zämmegschtande, genau do, wo de Paule hett anefahre solle und er isch im Rückwärtsgang dert ane schongliert, woner mit sim Laschter hett anefahre solle. Etz hond sich aber die junge Herre kolossal gschtört gfühlt, weil der Paule mit sim Laschtwage genau dert hot anefahre möße, wo die hoffnungsvolle Zukunftsträger gschtande sind. Er hot s'Fenschter vu sim LKW abedrillet ghet, uf de linke Siite, wo de Fahrersitz isch. Do brüelet so en junge Schnufer zum Paule nuf: »Mosch du ausgrechnet do here fahre, wo mir schtond, du alte Seckel!« De Paule hot glacht, wie'ner alleweil glacht hot, wenner denkt hot, s'dät sich it rentiere, dasser sich ufregt und hot seeleruhig vu sim Fahrersitz obeabe gschwätzt: »Wenn ihr Schwierigkeite hond mitem alt were, no mond ihr eu nu bizeite ufhänge.« Der klassische Satz vum Paule isch mir ä Läbe lang nume ussem Kopf, weil'er zu sellene Sätz ghört, wo mer demit läbe ka, und weil's alleweil wiedermol Glägeheite gäe hot, wo i den Satz hon bruche känne. Au i bi zum Beischpiel mit mim Autole bim Zruckschtoße beinah ane Moped gschtoße, aber nu beinah, und um des Moped sind en Hufe junge Bursche gschtande, aber do war ebbes los. Mindeschtens drei hond wie im Schprechchor s'gleiche Wort gset, wie zum Paule. Alte Seckel hond se mi gheiße und ä paar hond glei dezue no des verwandte Wort gseit, nämlich Arschloch. I bin i dem Fall schnell zuegfahre, weil die mei VW-le umgworfe hetted, wenn i au so reagiert hett wie de Paule. Dem sin Laschtwage hetted se it umwerfe känne, aber i hons' gliich denkt, wie de Paule. S'isch mer no meh mol so gange, aber seit ä paar Woche hon i en völlig neie Gedanke, wenn mer mich apöblet und mir Wörter nochrueft, vu »alte Simpel« uf- oder abwärts! I hon seit neieschtem ä total's Gfihl fir Iberlägeheit, dass i direkt ufpasse moß, dass i uf mine alte Täg it no iberheblich wir. Aber des Gfihl, des tragt om, des lupft om, des hebt om iberalle menschliche Minderwertigkeitsgfihl use, bsunders sellene, wo mitem Alter zämmehänged. Mir soll nomol irgendebber alte Simpel sage, den vernicht ich miteme onzige verachtende Blick, us dem aber en leuchtende Schtolz erkennbar isch, wo sich jeder Kleingeischt froge moß, wa isch i den alte Kerle ufomol neigfahre, dass der so selbschtbewusst und so schtolzisch. I kännt'ene mei Geheimnis sage: De neue Papscht isch so alt wie ich!

Von Walter Fröhlich