Wafrös Alemannische Dialektik vom 11. Juni 2008

Dass mer de Baure nu zwische 27 und 35 Cent fir de Liter Milch zahlt, des isch one vu däne Sauereie, wo bi dere neie, glorreiche Welt- und Wirtschaftsordnung usekummed. Sogar a de Milch, dem Grundnahrungsmittel, verdiened sich selle, wo am längere Hebel sitzed, no ä goldene Nase. De Zorn vu de Baure ka me guet verschtoh und dass se etz mol uf d Barrikade gond, isch nu zu begreiflich. Iberall fordered se fimf bis zeh Prozent meh Lohn und de Bauer drucked se, wo se känned. Etz hot sich de BDM, also de Bund Deutscher Milchviehhalter, uf d Hinderfieß gschtellt und en Streik beschlosse, mit dem Ziel, dass de Bauer fir d Milch letzschtendlich 45 Cent kriegt, wa it meh als recht und billig wär.  Lächle hon i mösse, wo i gläse hon, dass der Milchverband BDM heißt, weil i no ihm Ohr hon, dass de BDM mol s Gegeschtuck zu de Hitlerjugend gsi isch, nämlich de Bund Deutscher Mädchen. Und wo i grad so bim Lächle gsi bin, hon i nomol die Farbbilder aaglueget, wo i unsre Zeitung wared und wo se zeigt hond, wie die Milchbaure zum Teil streiked.  Die oene hond 8000 oder 3000 Liter oder meh oder weniger is Gülleloch laufe losse, aber ä paar hond au us dem Milchstreik ä richtig's Happening gmacht. Bi uns im Hegau hond fimf Fraue ime Milchbottich, bei 25 Grad warmer Kuehmilch, ä Bad gnumme. Nadierlich it näckig, sondern i ihrene Badanzüg, wa aber au richtig neckisch usgsäeh hot. Des war mol ebbes ganz anders. Fimf Wiiber ime Milchbad. Und sie lached uf dem Foto und freied sich iber den Gäg und z Behla bi Donaueschinge wared Stucke zeh Streiker bis iber de Buchnabel i dere warme Kuehmilch.  Au däne hot me agsäeh, dass se en Sauspaß hond und des isch ja de diefere Sinn vume Streik, dass me au no en Sauspaß hot. Wie selle allerdings reagiert hond, däne der Streik golte hot, des isch ä andere Frog. Sie kännted sich am End sage, solang die Baure bim Streike so ä Gaude hond, ka ihren soziale Schmerz it gar so groß sei. Wer so luschtig streikt, dem ka's it schlecht go, drum hetted se i ihrne Milchbadwanne wenigschtens weng ernschte, leidige Gsichter mache solle. Aber wahrscheinlich wared se so fröhlich, weilene ufdämmeret isch, dass des die Idee der Zukunft isch, des neue BDM des BaDische Milchbad! Mer baut große Zelt, mitere Art Swimmingpul, und do derf Groß und Klä, Männle und Wiible i die neie Milch-Kurbäder, wo me mit de Gable vume Heuwender en Whirlpul macht und vu de Dreschmaschi aus goht ä Rutschbahn direkt i die warme Milch.  Dusse brucht mer ko Handtuech, weil mer vu de Küeh trockegschleckt wird, wobei die raue Zunge fir ä Massasch und firs Peeling sorged. Des hebt de Tourismus und bringt de Euro masseweis i die leere Baurekasse. No känned se sich ihre 45 Cent a de Huet stecke. Idee moss me halt hon, innovativ moss mer sei. Dass die Wiiber i dem Milchzuber Pauer hond, des sieht mer uf dem Foto deitlich, aber Streikgsichter hond se kone.

Von Walter Fröhlich