Wafrös alemannische Dialektik vpm 4. März 2009

Etz grad moss i alleweil a sell Büeble denke, wo sei Modder gfrogt hot; Gell Mamme, de liebe Gott isch en Eimer? Wa schwätzsch au fir en Bledsinn, hot sei Mamme gmont, de liebe Gott isch doch unsern Schöpfer! Siehsch Mamme, dass er ebbes us Blech isch, des hon i doch no gwisst, war d Antwort vu dem Büeble.

Wieso i etz do druf kumm? Weil etz grad s Läbe saumässig schpannend isch. Weil's so ziemlich uf de ganze Welt drum goht, dass Gott zwar kon Eimer, aber im Eimer isch. Mer hot zwar ä zeitlang gmont, dass sich d Naturwisseschaft und d Religion wieder vertrage däted, aber es sieht so us, als ob de Krach wieder vu vorne losgoht.

Etz hot mer doch grad de zweihundertschte Geburtstag vum Charles -also vum Karle- Darwin weltweit abgfacklet, do hot me wieder mol feschtgschtellt, dass sei Evoluzionstheorie halt eifach, bis uf ä paar Problemle, wo no it richtig erforscht sind wisseschaftlich schtimmt.Do sind sich it nu d Naturwisseschaftler einig, au d Religion isch beinah z friede aber äbe nu beinah. Wo i als Bue no Religion ghet hon, do hot me au kurz de Darwin Karle gschtreift. Mir hond aber nu erfahre, dass er behaupte dät, dass de Mensch vum Aff abschtammt. Wenn uns on froge dät, ob mir des glaubed, no sollemer zu dem nu sage, "jo du scho, aber ich it!" Meh hot me uns iber sei bahnbrechendes Buech "Über die Entstehung der Arten durch natürliche Zuchtwahl" it verzellt. Des Wort Evoluzion hond mir no it kännt. Mir hond halt de Schöpfungsbericht vu de Bibel kännt, des hot uns domols glanget.

Inzwische hond aber die chrischtliche Kirche au umgschalte und wissed, dass de Mensch und de Aff gemeinsame Vorfahre hond und dass die Schöpfung, also alls wa entschtande isch, scho so entschtande isch, wie des de Darwin erforscht hot. Nu isch d Religion de Meinung, dass hinder dere sich entwicklete Schöpfung en Schöpfer schtoht, wo alles plant hot, nämlich Gott. Die schtrenge Darwinischte saged, dass es kon Gott brucht, weil alls wa isch, sich us füsikalische, chemische und biologische Naturgsetz entwicklet hett.Mer frogt sich nadierlich scho, wägewarums vor vierhundert Millione Johr derart vill Irrläufer vu däne unendliche Arte gäe hot mösse, it nu bi de Pflanze und de Viecher, au bi de Entwicklung vum Mensch?

Mit dem Urknall sind se sich no einig, d Wisseschaftler und Theologe. Nu frogt me sich no, "wer oder wa hot knalle lo?" Inzwische giits z Amerika haufewiis die sogenannte Kreationischte, wo glaubed, dass des alls Bledsinn isch mit dere ganze Evoluzion, dass nämlich alls so gsi isch, wie's i de Bibel schtoht. I siebe Tag hot Gott alls gmacht wa isch und au de Mensch und weil der gsündiget hot, mond alle schterbe! Nu isch scho gschtorbe wore, bevor de Mensch entschtande isch Also s isch saumässig schpanend etz grad, Nadierlich sind sich d Naturwisseschaftler no lang it i allem einig. En Gscheidele dä etz do sage, s giit i vill no kon Konsens, des klingt wie "hot kon kon Kamm?" Aber au i däne Lefebvreköpf schpuckt vill vu däne Kreazionischte, wo no glaubed, dass d Eva ussere Rippe vum Adam gmacht wore isch. Während die selle, wo vill denked, weil se ohne Denke it exischtiere känned, driber nochhirned warum und wieso de Schöpfer alls so kompliziert gmacht hot und ob des schtimmt, dass alls sowieso kon Sinn hot und de Mensch eigentllich iberhaupt garit plant war.Wo i etz den Satz anegschriebe ghet hon, do hon i mei Büechle ussem Regal gnumme mit dem Titel: MER SOTT IT SO VILL DENKE!"

Von Walter Fröhlich