Wafrös alemannische Dialektik vom 28. März 2007

Wenn me it alles täuscht, no isches de Hans Sachs gsi, vu dem der schäne Satz schtammt: »Die Geischter wached auf, die Wisseschafte blühed, es isch eine Luscht zu läben.« Mer moß nu am Morge sei Zeitung ufschlage, oder im Radio d Nochrichte lose oder i de Fernseher luege, no merkt mer glei, wie die Geischter ufwached, und wanes fir ä Luscht zu läben isch, weil die Wisseschafte blühen. Wenn de zum Beischpiel als erschtes erfahrsch, dass z Norddeutschland one ihre neugebores Kind ussem zwanzigschte Schtock uf d Stroß abegworfe hot. Fir des neie Menschekind war's ä kurze Luscht zu läben und wa des fir ä Luscht zu läben isch, wenn se mol i ihrem kaputte Hirn dehinder kunnt, die Muetter, wa se do gmacht hot, des ka mer sich schier it vorschtelle. Aber so isches halt, die oene hond ä kurzes Läbe, die andere hond no ä kürzers. Die wäred scho entsorgt, bevor se uf de Welt sind. Unsere heitige Welt isch äbe schnellläbig, do goht alles hopplahopp. Und weil äbe alles hopplahopp goht, moß mer luege, dass mer meglichscht vill vu dere Welt mitkriegt, äbe weil's ä Luscht isch zu läben. Mir wird's menkmol ganz schwindlig, wenn i se als verzelle her, wie luschtvoll ihre Läbe isch. Set neilich one zu'mer, wo's so guet mit mir mont, »Wafrö, warum golfen Sie eigentlich nicht? Das ist doch eine Sportart, die zu Ihnen und zu Ihrem Alter fantastisch passen würde?« I hon denn nu gmont, i hett Angscht, dass i des kläne Bällele it treffe dät und den Golfschläger us Versäeh om uf de Grind hau. Ach das gibt sich doch beim Üben. Denn hot se mer vorgschwärmt, wie guet mir die frische Luft dät und wa i do fir gesellschaftliche Kontakte knipfen känne däte. Ihr Männe würde allerdings das hässliche Föhnklima am Bodensee nicht mehr ertragen. Sie hetten zerscht uf Mallorca gegolft, aber des sei efange so mit Gschmeiß iberlaufe. Do dät mer jo meh Lüt känne, wie dohom i de Schtadt. Uf Teneriffa und däne andere kanarische Insle hett's au scho z vill Eiheimische, etz seied se ufd Maledive usgwiche, aber im »Clab« het ihren Männe den Tip kriegt, dasses in Kapstadt, Hongkong und New Delhi Golfplätz gäb, die seied göttlich. Sie hetten ibrigens die Schwiegermutter jetzt im Altenheim unterbringen kännen. Trotz der Polin, die sie engaschiert hetten, sei immer noch zu viel Schtress gewesen. Wafrö glauben Sie mir, golfen im weißen Sand am Meer ist mehr als easy! I  woß, des hört sich etz reichlich gschuckt a, aber des Verruckte a dere Sach isch des, dass se etz grad protzed demit, wo se scho iberall gsi sind und wo se demnäkscht ane gond. Soll sich emol oner erlaube, sie ginged mit de Fahrräder is Elsaß oder gar i de Schwarzwald ge wandere, ha so Leit lueget mer hüt doch a, wie wemer mit däne Mitleid hon müeßt, aber wahrscheinlich sind se selber schuld, wenn se's zu nix brocht hond. »Erst muss der Mensch etwas leisten, bevor er sich etwas leistet«, hot mol oner zu mir gset. Dem sei Leischtung war de Erbschein vum Vadder, aber iber de Firma sind bald druf d Pleitegeier gfloge. Ibrigens en Opa, wo sei Firma no fescht hebt, den schiebed se it soglei ab is Heim, mindeschtens it solang er sine siebe Sache im Kopf no binenand hot! Dem Opa, wo scho drei Woche lang im Küehlfach liit, weil die Hinderbliebene s Geld it herbringed, dem ka's eigentlich egal sei, wie lang s'en no liege lond. Irgendwenn wäred s'en scho beerdige. Allerdings schpillt denn ko Musig und s brenned kone Kerze. Ob no en Hilfspfarrer en Säge giit, isch au it gwiss. Ohne Geld holt den ko Bestattungsinschtitut, ohne Geld verbrennt mer den it und so losst mer en halt liege, bis ebber kunnt und zahlt. Mer moß sich i dere schnellläbige Zeit Ziit lo, wie sell Päärle, wo de Friedhofsverwalter gfrogt hot, wenn mer denn die Urne vu ihrem Vadder beerdige soll. No hond die zwei gmont: Etz gomer zerscht mol vierzeh Tag i d Ferie uf Mallorca! Do dät etz wieder basse: »Es isch eine Luscht zu läben!« Etz wa des fir Geischter sind, wo etz grad ufwached, des isch no it husse, genauso wenig wo na oder wo ane sich trotz de blühende Wisseschaft de Mensch entwicklet.

Von Walter Fröhlich