Wafrös alemannische Dialektik vom 27. Dezember 2007

Also so ä fromme Advens- und Weihnachtszeit ho'mer scho lang nume ghet, find i. Do sind sicher vill Lüt anderer Meinung, weil se sich saged, so schlimm sei's no garnie gsi wie etz grad, wemer d Kriminalidät als Maßstab nimmt. Dass Müettere ihrne Kinder verhungere lond und d Vätter debei zuelueged do ka me doch nu no sage, wa giits au fange fir Lüt uf de Welt. Sottige hots aber scho alleweil gäe, nu hot mer nint devu erfahre, weils no ko Radio, ko Fernsäeh und ko Internet gäe hot. Etz isch d Menschheit scho so guet entwicklet, dass wenn on z Kapstadt, z Melbörn, z New York oder z Peking im Vollrausch sei Frau dotschlet, oder umkehrt, zwanzg Sekunde schpäter wisseds mir bereits. Und so wissed mir etz au, wie gläubig mir z Deitschland sind und wa de Tony Marshall und de Wieland Bakes z Wiehnächte macht. Uf fascht allene Sender, uf allene Kanäl hond se's wochelang devu ghet, dass ä neie Welle vu Gläubigkeit iber unser Volk reibricht. Nadierlich hond im Fernsäeh au d Atheischte mitgschwätzt, aber mer hot so s Gfihl ghet, wie wenn die neie Gläubigkeit triumfiere dät. Des isch nadierlich wenig ä zweischneidige Sach. Zwar hond se usegfunde durch ä Schtudie, dass 70 Prozent vu de Deitsche gläubig sind. Die meischte wissed zwar it a wa, aber sie glaubed a ebbes und die meischte glaubed a Gott. Trotzdem laufed de Pfarrer vu unserne grosse Kirche d Schäfle devu, weil ene d Kirchesteuer z vill isch und en Gott, wo no ebbes koscht, den tauscht mer lieber gege on, wo's umesuscht giit.Vill vu däne Getaufte sind aber dere Meinung, dass die Pfarrer Gott nume rüber bringed, weil des sogenannte dogmatische Gefüge nume verschtande wird. Do giits denn so Professore i beide grosse Konfessione, die tond denn die sogenannte Dogmatik wieder so erkläre, dass de Lüt wieder verschtoh kännted, aber die wirft mer uf beide Siite use, des heisst, mer entzieht'ene die Lehrbefugnis. Vill Pfarrer halted s Mul und mached wiiter wie bisher, weil se Angscht hond, dass se arbeitslos wäred und mer schtudiert jo it johrelang Theologie, damit mer später mit Hartz vier de Hof firbe ka.Vill vu dere neie Gläubigkeit dunkt me ä bitzele fadescheinig. Wenn se uf Rom schimpfed und behaupted, fir sie sei de Papscht unfehlbar, warum wered se denn it alt-katholisch, aber des wäred nu Pfarrer, wo vum Zölibat nint meh halted. Wer de Kirch devulauft, wexlet selte ine andere Konfession, sondern macht in Zukunft sei Religion selber. Des wär ä Marktlücke fir unsere Volkshochschuele: "Wir basteln uns eine Religion!". Ä Prisle Budha, Islam und wenig Hindi, au im Sufismus ebbes find i, au i de Esoterik sauvill Wohret steckt, abra kadabra, scho isch mei Religion perfekt. Des hot sicher de Alte Fritz gmont, wo'ner gset hot, "jeder soll noch sinere eigene Fasson selig were.D Ursula von der Leyen hot au verzellt, wie's a Weihnachte binene zuegoht. S giit ko Gans, des wär z ufwändig, s giit ä kalts Büfee und de Babbe schpillt Klavier. Denn singed se "Ihr Kinderlein kommet", wa i wenig ibertriebe find, wemer scho siebene hot.De Marco hot homderfe, fir den sich Weihnachte ä Fäscht der Befreiung, nu d Ursula Cantieni hot d Nase voll vu Adventskranz, Plätze, Guetsle und Chrischbom, weil se scho ab Oktober i de Faller-Serie nint anders dreht hon. S isch au it iberall Friede, Freud und Seligkeit. I kännt mer denke, dass unserm Landesvaddeer s Porsche fahre saumässig verleidet isch, obwohl so en Porsche jo s Schtatussimbol fir Ufschteiger isch.S giit aber menkmol Situazione, wo om pletzlich ebbes verleidet, wa om früener gfalle hot. Dass se etz aber den Taxifahrer, wo sin Fahrgascht, de "Schumi" as Schteuer glosse hot, dass se den no schtrofe wänd, weil des en Verschtoss bedeitet, wenn en Taxi-Schofför en Fahrgascht a de Lenker loot, des isch meh als ibertriebe. I glaub des wenigschtens und somit wär bewiese, dass i au en Glaube hon.

Von Walter Fröhlich