Wafrös alemannische Dialektik vom 24. Oktober 2007

Wemer i unsere Ziit ko Auto hot, no isch mer arm dra, bsunders wemer all ä weng Druck im Gnick hot, so wie i etz grad. Wemer fufzg Sache gleichzeitig mache sott und alls ame andere Ort. Mer sott eigentlich mone, dass des miteme gwisse Alter ufhert, aber s wird all minder, weil alle Lüt moned, mir Rentner hetted jo Ziit, mir hetted jo ko andere Arbet, als ufeme Bänkle hocke und warte, bis es gar dunkel isch und Zeit, dass me is Bett goht. Die wo so ebbes glaubed, die wäred mol säne, wievill freie Zeit en Rentner hot, wenn se selber mol sowiit sind. Und es soll jo kon Junge glaube, dass er ewig jung bliibt und nie alt wird. S giit en Hufe Junge, die sind etz scho alt, nu merked se's it.Drum wär me arm dra, wemer ko Auto hett, mer wär, i woss garit wani wär, wenn's so wär, aber i hon jo gottlob ons. Aber wemer ons hot, so ä Auto, no isch mer under Umschtänd au arm dra. It deswäge, weil s Benzin all teirer wird und om so ä Kärrele arm frisst, sondern weil allhäck ebbes verreckt a deim Wägele. I denk etz it anen Zylinderkopf, ane Kupplung oder ane Kurbelwelle, nei i denk a die Kleinigkeite, a die womer eigentlich iberhaupt it dra denkt.S fangt jo scho a mit em Scheibewischer. Wenn der dumm duet, kauf'schdr am beschte glei ä nei's Auto, weil des Hureglump vu Scheibewischer om rasend mache ka. Er verreckt nadierlich it zunere normale Zeit, sondern hoorgenau, wenn's Katze haglet, also wenn's saicht, dass de monsch, de Himmel kunnt obera und ohne Wischer siehsch halt ums Verrecke nint. Etz fahr emol ine Werkschtatt, wenn de one findsch. Mon do renned se, wenn du miteme hiine Scheibewischer kunnsch! Am beschte schtellsch die Auto i die Werkschtatt und gohsch i die näkscht Wirtschaft, trinksch en Schnaps und zwei Bier, no hosch din Führerschein los, wenn se de verwisched, no bruchsch au kon Wischer meh.Wenn se om gege Obed blinked, selle wo om vergege kummed, no kasch Gift druf näeh, dass a dim Liecht ebbes it schtimmt. Rechts ran fahre und luege und tatsächlich isch ä Birnle kabutt. Ein modernes Auto isch so konschtruiert, dass mer zum Wexle vume hine Birle am beschte de Motor ausbaut, weil de Mechaniker denn am beschte beikunnt. Seit i min Schlitte hon, lueg i mim Automechaniker jedesmol zue, wenn er ä Birnle uswexle moss. Wa hon i scho die Konschtruktör verfluecht, weil min Mechaniker sich verleide moss, mer ka it zueluege. Der brucht Händ wie ä Hebamm und des langet au it, weil se d Motorteil direkt hinder die Scheinwerfer gsetzt hond, dass der arme Kerle iber ä halbe Schtund fummle moss und d Händ vergretzt, bis'er a des Birnle kunnt. Alles isch hochmodern und ä Elektronik, wo ko Sau draus kunnt und ausgrechnet s Liecht hond se so seckelbled dezwische klemmt, dass de it bei kunsch.I hon en Mechaniker ghet, der war vum Schicksal bsunders begünschtigt. Er hot ä Tankschtell zu sinere Werkschtatt ghet, denn hond se die wäge Umsatzschwäche abgrisse. No isch ihm d Frau gschtorbe und zu mir hot'er immer gseit, wenner ä Birnle inegfieselet hot, "so ä Händle dirft nie schterbe". Er hot sich nomol mitere Frau zämmetue, weil er d Werkschtatt und sei kläs Lädele näbeher elei it gschafft hot. Sie war vum Balkan, miteme mords Balkon und bald druf ischer gschtorbe, min fleißige, brave, gschickte Sigmund. Sei Urne schtoht näbe de Urne vu sinere Frau und i bliib als ä Weile schtande vor dem Mäuerle und sag nomol dankschön. Ohne flueche hot'er Birnle gwexlet, mit sim unschterbliche Händle. S onzig, waner als useglosse hot, war jedesmol der Satz, den wo i nu underschtreiche ka: "Ka me au so en Saich konschtruiere?"

Von Walter Fröhlich