Wafrös Alemannische Dialektik vom 24. Juli 2008

Kirzlich, also neilich, hot mi ä Dame agschproche, also ä richtige Dame, ko gwähnliche Frau, und hot mi ebbes gfrogt. Etz moss i z'erscht erkläre, wa ä richtige, also ä ächte Dame isch. Des isch one, wo me glei sieht, dass'es ko gwähnliche Frau isch.  Mer dät besser sage, ä normale Frau, weil ä gwähnliche Frau äbe one isch, wo gwähnlich isch und gwähnlich isch it normal. Ä gwähnliche Frau sagt zum Beischpiel wüeschte Wörter, wie Scheiße, und des efters. So ebbes sagt ä Dame nu ganz selte, weil des zu ihrem Autfit it basse dät. S Autfit vunere Dame, me kännt au sage s'Häs, isch nobel, vu de Schueh iber Rock, Bluse und Handtäschle basst all's zämme und me sieht glei, dass all's teier war, wa sich ä normale Frau it leischte ka. Ä Dame kauft inere Butik und ä normale Frau ime Lade oder ime billige Kaufhaus. S giit nadierlich au Dame, die kaufed im Sekendhänd, weil's do menkmol Sache giit, däne wo me garit asieht, dass se scho mol inere andere Dame ghert hond.  Uf alle Fäll war des ä Dame, wo mi agschproche hot und sie hot wisse welle, ob ich ihr sage kännt, was ein "Hafenkäse" sei. Sie heb des Wort scho efters ghert und kännt sich nix drunder vorschtelle. Sie hot gmont, s dät sich viellicht um en Käs handle, wo im Konstanzer Hafe gmacht wird. Etz hon ich ihre den Hafekäs erkläre welle und hon dodebei feschtgschtellt, dass des mit unserne alemannische Schpezialausdrück garit so eifach isch, wie mer mont.  Eigentlich isch en Hafekäs ä so genannte Kleinigkeit, so ebbes Ähnlichs wie "ä Wengele" oder au "ä Bitzele". Wenn ä Bitzele no weng weniger isch als ä Wengele, no giit's nu no ä Muggeseggele, des isch des Geschlechtsteil vunere Fliege, also so guet wie nume sichtbar.  En Hafekäs isch aber zwar scho ä Kleinigkeit, aber kone wo mer messe ka. Ä Bitzele und ä Wengele, jo sogar no  Muggeseggele ka mer messe, obwohl's fir die Begriff kone Maßeinheite giit. On haltet ä Wengele fir ä Bitzele und en andere ä Bitzele fir ä Wengele und ä Muggeseggele no weniger als ä weng ä Bitzele.  De Hafekäs hot no en ganz andere Inhalt. Bei ihm handlet sich's it um wenig oder vill, bei ihm handlet sich's um so ebbes wie en moralische Wert. Mer ka sich nämlich wäge me Hafekäs ufrege, schtreite und sogar schlage. Mer ka wäge me Hafekäs beleidigt oder verkracht sei und me ka wäge me Hafekäs bläre oder seelisch leide. Alles des isches it de'Wert, weil mer sich wäge me Hafekäs it ufregt, it schtreitet oder schlagt.  Wäge me Hafekäs isch me it beleidigt und it verkracht und me bläret it wäge jedem Hafekäs. Dodemit will mer sage, dass sich des all's it rentiert, wäge sonere Kleinigkeit und do schließt sich wieder de Kreis, weil de Hafekäs wieder ä Mengeangab wird, nämlich ä Wengele, ä Bitzele oder nu ä Muggeseggele. Insofern isch also de Hafekäs doch nix anders als ä Kleinigkeit, aber äbe one, fir die sich's it rentiert, dass me bläret oder sich schtreitet. S isch also ä Kleinigkeit, ä Wengele oder ä Bitzele hinder dere no weniger isch als ä Bitzele oder ä Wengele.  Wenn i aber etz dere Dame erklärt hett, dass en Hafekäs eigentlich scho fascht ä Muggeseggele wär, no hett se am End glei garnixmeh verschtande. Ob se ebbes verschtande hot vu mim Schprochkurs, des woss i it. Uf alle Fäll hot se sich bi mir bedankt. S war äbe doch ä ächte Dame, denn ä "Gwöhnliche" hett gmont: "So en Scheiß!".

Von Walter Fröhlich