Wafrös alemannische Dialektik vom 23. Februar 2005

Wie en Mensch zu sim Schpitzname kummt, des isch ä Myschterium. Des hot nint miteme Minischterium z'tued, obwohl's au ä Myschterium isch, wie manche Leut do nei kummed. Ä Myschterium isch ä Geheimnis. Manchmol leitet sich de Schpitzname vum Vorname oder vum Familiename ab, aber wieso etz de Robert Klügle usgrechnet »Krasse« heiße moß, des hon i bi mine Reschärsche um all's i de Welt it rauskriegt. Mitem Krasse hon i scho manche Schlacht gschlage, sei's underem Johr oder a de Fasnet. Mitem Krasse ka mer Pferd schtähle und wenn's grad kone Ross hot, denn halt ebbes anders. De Krasse isch en Kerle wie en Bom, grad und ufrecht, ehrlich und treu wie Gold. En Freund, wie mer sich on wünsche dät, wemer kon het. Er hot nu en winzig kläne Macke, de Krasse, und i dät it emol sage, dass'er en Fähler wär, der Macke vum Krasse. Er hot en unglaubliche Durscht und i lueg all ehrfürchtig zunim uf, weil i alleweil no'it fasse ka, wieviel i de Krasse neigoht, wener am Durschtlösche isch. Viellicht sott'er halt Schprudel trinke, aber den ka'ner it verbutze. S'moß ä Viertele sei und des meglichscht vum See. En Hagnauer, oder on vu de Haltnau, also en Konstanzer. En Meersburger, oder au en Reichenauer und vum Hohentwieler-Elisabetheberg goht au ä beträchtliche Menge i de Krasse nei, wener grad Durscht hot, und eigentlich hot'er so ziemlich alleweil Durscht, de Krasse. Wer unsere Landschaft und die guete Tropfe mag, wo bi uns umenand wachsed, der kännt nadierlich au so ziemlich alle Wirtschäftle i däne Schtädtle und Dörfle ringsrum, vor allem selle, wo's gmüetlich isch. Er kännt im Hegau umenand au die Entfernunge vu Singe uf Beure, vu dert uf Schtiißlinge. Er woß, wie wiit dasses isch vu Huse iber de Remishof uf Singe und wie lang mer vu dert uf Rüelasinge brucht, oder gar no ge Bohlinge. Die Entfernunge kännt'er vor allem vu sine nächtliche Fueßmärsch, weil's ihm allwieder mol passiert, dass er laufe moß und s'Auto schtande losst. Des macht en vernünftige Autofahrer sowieso, wenn'er Alkohol im Bluet hot, aber de Krasse hot meischtens nu no weng Bluet im Alkohol, wa noch dreizeh Viertele halt de Fall isch. Und wenn de Durscht so groß isch, dasses zu sonere Materialschlacht kunnt, no lauft de Krasse. Er lauft denn homzues, oder au zume Fründ, weil er regelmäßig s'Auto nume off bringt, weil er de falsch Autoschlüssel debei hot. Dass er mit dem gliiche Schlüssel au do hergfahre isch, woner etz grad isch, des schnallt de Krasse numme. Er behauptet, dass sei Auto it off goht, weil er de falsch Schlüssel debei het. Intressanterweis hot'er mit dem falsche Schlüssel im Summer efters scho mol de Kofferraum ufbrocht und im Kofferraum Quartier bezoge, fir de Rescht vu de Nacht. Aber im Winter probiert's de Krasse am Kofferraum gar it. Ihm langet's, dass d'Wagetüre it off goht und uf die Art isch de Krasse no nie vunere Bolizeischtreife kontrolliert wore, weil er äbe nie hom fahrt, wenn'er glade hot, weil'er jedesmol a sin falsche Autoschlüssel glaubt. Weil er noch'ere Weile die Suecherei noch dem Schlüsselloch ufgibt und uf die Scheißkerle fluecht, wonim wieder de falsch Schlüssel in Sack gschteckt hond. Nu omol ischer vu sinere FalschSchlüssel-Theorie abgwiche. Do hot'er behauptet, er häb hinde links und rechts en Platte. Er hot des mühselige Offschließe garit probiert. D'Hinderräder vu sim Auto sind inere Drecklache gschteckt, bis zu de Felge. Des war für ihn en Platte und er isch vu Hause uf de Remishof zue gloffe. Er häb firchtig laut gfluecht, i dere Vollmondnacht, weil se ohne Vorankündigung die Papple gfällt und uf de Schtroß hond liege lo. Etz ischer iber alle die Schatte gschtiege, wo de Mond uf d'Schtroß zeichnet hot. Debei war er desmol beinah nüchtern, weil's nu zwelf Viertele wared und kone vierzeh. Er isch scho en Mordskerle, de Krasse, und i bi richtig froh, dass er zu meine Freund zellt.

Von Walter Fröhlich