Wafrös alemannische Dialektik vom 19. Juli 2006

Heinomol isch des luschtig etz grad. Singe macht die Welle, wa it so richtig schtimmt, denn eigentlich macht's de Überschlag. Sie tond nämlich d'Inneschtadt iberdache, des heißt, sie bringed unsere City unders Dach. Die oene sind defir, die andere sind degege, aber wa se it under Dach bringed, des wär endlich mol en neie Schefarzt fir d Gynäkologie, a des fascht scho globale Klinikum, wo früener mol s Krankehus gsi isch. »Schillinger« isch jo scho lang pensioniert, aber fir mich isch des it »Schillinger« sondern all no de Professor Dr. Schillinger. Aber des mit däne Professer und Doktertitel hond se sich i de Presse scho lang abgwöhnt. Wahrscheinlich weil selle, wodes agordnet hond, nie Dokter wore sind, geschweige denn Professer. Etz heißt's nu no Kley, Rühland, Goerttler und Schillinger. Die Gleichmacherei isch mit Verlaub zum Kotze und en Verschtoß gege die Würde der Person, weil bis etz all no de Titel en Beschtandteil vum Name isch. Und wäge warum krieged se für de Prof. Dr. Schillinger kon Ersatz? Weil se schpared bim neie Schefarztvertrag. Schtatt ä Dach iber d Schtadt, däted se gschiider en renommierte Schefarzt eischtelle, aber bi dem Vertrag, do winked alle ab. Bi uns momer Talkmaschter und Fueßballer hoch honoriere und kone Schefärzt. Vu däne hot's jo gnueg umenand, aber scheint's schtimmt des doch it so ganz ... D Konschtanzer lond etz de »Lukoschek« sause, also de Herr Prof. Dr. Lukoschek. Er hot sich direkt as Minischterium gwendet und do demit hoter gege sin Arbeitgeber verschtoße und nix isch schlimmer als des. Er hot welle s Vincentiushaus, wo er Schefarzt isch, dert losse, wo's etz isch und alleweil war. Sie hond's nämlich verlege welle as Krankehus und do giit's mehrere Gründ, wäge wa de Professer degege war und isch. Er hot en guete Vertrag, aber wenner goht, kriegt de Nochfolger wahrscheinlich nu no d Hälfte, no schpared se fascht ä ganzes Schefarztgehalt. Der Prof. Dr. Lukoschek hot aber firs Ansäeh vu Konschtanz meh tue, wie ä ganze Kompanie Beamte. Unendlich vill leidende Mensche, wo kaputte Knie und hie'ne Hüfte ghet hond, us ganz Süddeutschland, die hond, wemer se gfrogt hot wo se ihre Knie mache loh wänd, noch reiflicher Iberlegung gsagt, »mir gond ge Konschtanz!« Die Schtadt hot fir ä Legion vu Hüft- und Knie-Kaputte en tolle Ruef ghet, it weil se am See liit und it weil mer de Säntis sieht, sondern wägem Prof. Dr. Lukoschek, aber den losst mer etz laufe. Wenn se mol ä Schnäpple gmacht hond, no war des der Orthopäde! Mer sott mone, dass se eigentlich Vernunft aanäeh däted, aber die derfed nix aanäeh, des sind jo Beamte! Wie heißt der Slogan: »Sauberer isch's Konschtanzerischer!« Do kasch nu no sage, sauber ...

Von Walter Fröhlich