Wafrös alemannische Dialektik vom 10. März 2010

D Leit froged mi all wieder,"jo sag emol, wie machsch du des au mit dim Haushalt ohne Frau? Wer kocht dir oder hosch du Esse uf Räder? "Denn wirf i mi meischtens i d Bruscht und sag, nei i koch selber! No schtreck i mi weng i d Länge und mach mi so lang wie's goht und hon so s Gfihl, dass mei Frogere, oder de Froger en mords Reschpekt vor mir griegt und des isch beabsichtigt. Damit i aber it no meh gfrogt wer, gib i meischtens no ä paar Erklärunge ab, denn schtauned die betreffende erscht recht.
Also sag in denn, ä Woch hot siebe Tag und wenns a om Tag Schpiegeleier giit, no isch scho on Tag rum. Am zweite Tag giits Wienerle und frische Bretle und am dritte heisse Serbele mit Rahnesalot uss de Dose. Dodemit wäred scho mol drei Täg iberbrückt und denn bin i guet im Abkoche vu Teigware. Guet, i grieg defir kon Michelin-Stern, den bruch i au it, mir langet de Alefanzorde. Etz giits a om Tag Schpagetti und am andere Tag Hörnle, am dritte Tag Schpätzle und am vierte breite Nudle. Des wäred, wenner richtig rechne känned, siebe Täg und meh hot ä Woch it.
Damit aber min Schpeiseplan it zu eintönig wird, gibt's fir mi hervorragende Kuche-Events, weil i mit mehrere Meglichkeite schongliere ka. I leg fir jede Woch meglichscht so ä Event ei, no schmecked mer mine Nudle am Tag druf umso besser. A om Tag giits bim Karle original Kratzete und ame andere bim Chrischtele ä Schtuck vunere eigehändig gschossene Sau. Vu de Sigrun en feine Erbseintopf und vu de Gisela Kuttle noch Art des Hauses. Bim Bertele loss i mir d Linse schmecke und d Scharlotte sorget fir en Obsttag. Des sind nomol sechs Täg zu dene siebe!
Wa i do etz ufzellt hon, des isch nu s feschte Grüscht, wo i mi unbedingt druf verlosse ka. Do sind die Eiladunge zu Geburtstäg it enthalte, aber d Lüt wered jo all älter, so dass alle furzlang ebber en Runde hot und wenn de do eiglade wirsch, no kasch am Tag druf sowieso nint meh esse, weil de no satt bisch vum Tag vorher. Zudem griegt mer meischtens vu de Frau vum Gaschtgäber no ä Päckle mit fir de ander Tag, weil i meischtens, wenn die andere Gäscht gange sind, ä bitzele ä traurigs Gsicht mach, weil dohom niemerd uf mi wartet. Welle Frau mit Seele packt some Kerle it de Rescht vu de Schwarzwälder-Kirsch-Torte ei? Dass i no ä italenische Salami zum mim Geburtstag vum Alex und ä Schwarzwurscht vum Karle im Küehlschrank hon, derf i bi dere Wohltätigkeitsinventur it vergesse und wemmer des etz alles mol zämmezellt, no moss mer doch neidlos zuegäe, dass i eigentlich läb, wie de Vogel im Hanfsome. Der Psalmvers, "den seinen gibt's der Herr im Schlaf," trifft uf mich zue und do bin i aber au dankbar defir. Mer soll vorem eischlofe all Obed no fir sine Wohltäter bete und des mach i au, nu keied mir efters d Auge zue, wenn i ersch ä Drittel im liebe Gott empfohle hon, aber der woss jo, wer no alls dezue ghört.

Von Walter Fröhlich