Wafrös alemannische Dialektik vom 5. November 2008

Obs andere Leit au so oder ähnlich goht wie mir, des ka i it sage, aber i moss mol driber schwätze und weil grad niemerd do isch, no schreib i halt driber, des soll nämlich seelisch gsund sei, saged die Psichologe. Also wenn i am Morge mei Heimatzeitung ufem Kuchetisch hon und afang mit läse, no wär i innerhalb vu fimf Minute schwärmüetig, weil mi des, wa zur Zeit um uns rum und mit uns bassiert, schier zipfelsinnig macht. I kumm all meh dehinder, dass mei Büechle, "S wird all bleder," mer kännt sage profetisch isch. Mer sott zwar it glaube, dass es no bleder wäre ka wie's scho isch, aber mer kännt grad mone, dass sich die menschliche Bledheit bis is Unendliche schteigere ka. De Einschtein hot recht, mit sinere Feschtschtellung, dass es zwei Sache giit, wo unendlich sind, nämlich s Universum und die menschlche Bledheit.
Etz gucked se doch mol na, wa hond se denn do gmacht, mit dere große Finanzpleite, wo se all no rumrätsled, wie des kumme isch, dass mer weltweit de Karre so i d Scheisse gfahre hot, dasses grad i de Himmel schtinkt. Guet, i bi nomol devu kumme, weil i kone Akzie ghet hon, aber selle arme Lüt, wo s Geld, wo se ibrig ghet hond, i sogenannte Wertpapiere aglegt hond, weil se's it verglepfe, oder uf de Kopf hond haue welle, die gucked etz zumTeil saubled us de Wesch, denn wa nitzed ime Mensch Wertpapiere, wenn se nint meh wert sind? Etz tei sogar no d Poschtbank dief i de rote Zahle schtecke, hon i gläse und des alls, weil me dere US-Bank Lehmann Brosers Millarde gschuckt hot. I frog me nu allwel, wo kummed denn z'mol die Milliarde her, wo se etz iberall ufbringe wänd, wo se doch weltweit d Schiessete grieged, wenn se ä paar Milliönle fir Kinder-Kranke-oder Altersgeld ufbringe sotted. Etz macht des Problem nadierlich unsere Wirtschaft lahm. Nadierlich it s Rössle, de Löwe oder d Eintracht, nei d Weltwirtschaft und d Volkswirtschafte. D Automobilbroosche hots scho so wüescht troffe, dass se zvill Mercedes produziert hond, drum höred se etz uf mit Kärrele mache, bis Weihnachte.
S Öl isch billiger wore, aber des nitzt mi nint, weil i hon de Tank fülle lo mösse, wo's no teier gsi isch.. Etz hond se grad wieder ä Zeichnung i de Zeitung ghet, wo me gsäeh hot, wie des Konjunkturbarometer s Loch abegoht. Aber obedriber isch gschtande, dass die Bolidik de Absturz bremse will. Wie will au d Bolidik en Abschturz bremse, wenn alls wa die Rote vorschlaged, Schwachsinn sei, moned die Schwarze und wa selle fir richtig halted, sei meischtens Bledsinn, hört me vu de Liberale. Die Grüene sind sowieso de Aasicht, Schwarz und Rot seied Fehlfarbe, weil Grün nämlich d Hoffnung bedeitet, aber Hoffnung käm, wenn's iberhaupt ä Hoffnung giit vu de Linke und i mon halt, wer uf die sei Hoffnung setzt, ka se glei fahre lo Etz do soll mer it schwermüetig wäre!
Ä glei weng en Troscht isch denn wieder fir mi, dass se im neie schtatischtische Johrbuech endlich mol feschtgschtellt hond, dass die durchschnittle BH-Grösse. fir die Deitsche 80cm betragt. So ebbes richtet om denn wieder bissele auf, au wenn s Durchschnittsalter vu de deitsche Männer nu 77 Johr und bi de Fraue 82ge isch. En Ma wird bi uns im Schnitt 178 cm lang und hot Schuehgrösse 44. Er trinkt 108 Liter Bier im Johr und isst am liebschte Wurscht und Fleisch vu de Sau. Sie hond denn no andere Maaße agäe, wo i us Gründen vu de Schicklichkeit etz aber wegloss. Iber die kaputte Britnei Schpiirs wänd se etz en Film mache und sie will selber d Hauptroll schpille, des sind so Nochrichte, wo mi wieder weng ufbaued. Mer lueget au gschpannt uf de Bräsidentschaftswahlkampf vu de Amerikaner, wo die Parteie au no fir ihre Kandidate ebbes ibrig hond. D Republikaner hond fir ihre Vize-Bräsidentekandidatin, fir selle Sarah Palin 150 000 Schtutz usgäe, nu fir Klamotte, fir de Frisör und fir d Schminke. Do kännted sich unsere Parteie ä Scheibe abschneide, no däted unsere Bolitiker au mol ebbes gleichsäeh, aber wer lernt denn scho gern ebbes vume andere?

Von Walter Fröhlich